Amarjit: Jai Hind, Ustaad Saab! Last month hamare unit mein ek soldier ka accidental death ho gaya tha, aur hume uske mortal remains ko by air unke ghar tak pahunchane mein kafi problem hui thi. Kafi saare documents aur processes involve the aur iski wajah se unke next of kin (NOK) jo aaye the mortal remain collect karne, unhe kafi inconvenience hua tha. Kya aap bata sakte hain ke iske liye kya steps hote hain?
Ustaad: Jai Hind Amarjit, Aise incidents kaafi difficult hote hain family aur aapne sathiyon ke liye, aur iss samay par mortal remains transfer karne ke process ki jaankari kafi helpful ho sakti hai. Main samjhata hoon ki kya process hota hai.
India main kewal 3 airlines apne flight main mortal remains ko le jaane ki anumati deti hain: Indigo, SpiceJet, and Air India.
Amarjit: Ustaad Saab, kya in teeno airlines ka process alag-alag hai?
Ustaad : Airline ka process almost same hain. Pehle main batata hoon ki kaunse documents lagte hain:
- Local Police ka NOC (FIR ya Police Report nahi chalega) — NOC kewal local police se hi accept kiya jayega jahan par death hui hai.
- Death Certificate — Doctor/Hospital dwara jaari kiya gaya.
- Embalming Certificate (yatra ke 24 ghante ke andar jaari kiya gaya) — Doctor/Hospital dwara jaari kiya gaya.
- Coffin Sealing Certificate (Lakdi ka) — Coffin Maker/Hospital dwara jaari kiya gaya.
- Govt id Proof of Deceased.
- NOK (next of Kin) ke booked ticket ka PNR.
Amarjit: Ustaad Saab, airline ko hum ye kaise inform karein?
Ustaad: Iske liye, steps hain:
- Sabse pehle upar diye gaye teen airlines ki website par jaakar jis origin se flight mein travel karna hai uss origin se uska flight number note karo (Dhyan rakhna ki booking abhi nahi karni hai).
- Uske baad, NOK ko Origin ke Cargo office main contact karke availability ka pata karna hota hai.
- Airline ke Local Cargo offices ke contact numbers niche diye gaye link mein hain:
- Indigo
- SpiceJet
- Air India
- Accidental Death ya Ambush mein agar death hui hai to mortal remains ko shrink wrap karna padta hai taaki leakage na ho.
- Ek se zyada Body ke liye, Cargo office ko pehle se suchit karna padega taaki availability ka pata chale.
- Body ko scheduled departure time se 4 ghante pehle cargo ko saunp dena chahiye.
- Ticket ki booking aur cargo ka payment normally Units khud karti hai. NOK ko koi payment nahi karna hota hai. Ye unit ki jimmedari hai.
Amarjit: Ustaad Saab, is process mein aur kya khas baatein dhyan mein rakhni chahiye?
Ustaad: Iske alawa:
- Coffin ka size 72” * 25” * 12” (Lambai * Chaudai * Uchai) honi chahiye.
- Airline ke Cargo department ko call karo aur unhe batao ki aap mortal remain (Coffin) ko book karna chahte hain aur flight details do; woh check karke aapko status batayenge. Local cargo office ka contact number list upar diya gaya hai.
- Cargo department se availability confirm karne ke baad, saath mein yatra karne wale yatriyon se request ki jati hai ki woh usi flight mein ticket book karein. (Unit ko book karna hota hai)
- Deceased vyakti ka naam aur umar check karo aur ye saare important documents mein match hona chahiye.
- Upar diye gaye sabhi documents ka kam se kam 5 xerox copies le lo.
- Original documents Cargo office mein dikhana padega, lekin baad mein woh ise aapko wapas kar denge.
- Scanning ke baad, Cargo office Airway bill ki copy office seal ke saath issue karega, sabhi original documents aur Airway bill ki copy sambhal kar rakho.
- Destination par pahunchne ke baad, NOK ko Airline ke cargo section mein apni id proof aur Airway bill ki copy lekar jaana hoga taaki woh mortal remain ko collect kar sake.
Amarjit: Ye kaafi detailed process hai. Aisi koi helpline hai jo inn paristhitiyon mein humari help kar sakti hai?
Ustaad: Normally, units ko is process ke baare mein pata hota hai. Agar nahi hai to tum udChalo ke customer care ko bhi call kar sakte ho. Vo tumhe guide karne mein help karenge. Iske alawa, tum ye process apne sabhi fauji jaankar ko bhi share kar sakte ho. Aise mushkil samay mein ye jaankari family ki life ko thoda easy kar sakti hai.
Amarjit: Bahut bahut dhanyawad Ustaad Saab. Main ye jaankari apne unit mein jaroor share karunga.
Jai Hind!🇮🇳
